LINDEBAUM PIRATE width=
Schwellemer Fasnacht 2024

zAllschwil isch jedi Baustell eini zviell!


Do zue, dört zue, hinde zue, vorne zue
Niene chunsch meh duure
Überall zue, do druggt uns halt dr Schueh
Miens halt eifach akzeptiere ohni murre

Am Lättewäg muesch jetzt Slalom fahre aber nit renne
d Strooss isch jetzt neu schön farbig, das isch kultiviert
Chasch jetzt bi 20km/h au uffm E-Roller penne
Für e Klauselauf wärde d'Pföschte wieder abmontiert

In dr Oberwilerstroos wird jetzt scho lang baut
dGmeini machts halt mit dr Masse
Au do häns dPlaner wiedr voll versaut
Füllt dr Radar bi dr Mühli inzwüsche dGmeinikasse

dGmeini-Schugger hän e riese Spass
Verstecke dr Radar hinter emene Ascht
Schiesse uff jede Schnälle, es isch dr Hass
Ghöre drfür scho fascht sälber in Knascht

In fascht keinere Stroos chunsch me druss
Do e Loch, dört e Grabe und no e Schild
Hoffentlich isch drmit au mol Schluss
Isch uff dr Gmeini überhaupt no öpper im Bild?

Jede kennt dr Baselmattwäg, kurz BMW
E Schilderwald und Labyrinth
Weiss gar nümm wo duure, chas nümm gseh
Das Chaos zSchwellheim macht uns blind

Meischtens ischs jo nit schnäll verbii
Plant wär e Wuche oder bis e halbs Joor
Uff däm Platz wär doch au mol öppis anders plant gsii
Druss worde sin 3 Joor und e Bauplatz, isch wohr

Und drmits de Arbeiter au nit langwilig wird
Macht me dStroos nit nur eimol uff und machts rächt
Nei nei, es ischt doch alles super organisiert
Gas, Wasser, Schei… uns wirds langsam schlächt

Uns isch scho klar wieso es immer so lang duurt
Die mache sLoch, dGmeini verlegts Rohr
Denn warte uff dPrimeo, es wird zviel gschnurrt
Und keine weiss wie's goht, denn duurts halt e Joor

Allschwil het durch das Theater e neue Sport-Alass
Durch die ganzi Gmeind, es isch au nit gheim
Dr Verastalter wird au nit mol meh blass
Alli mache mit bi dr Tour de Schwellheim

In dr Zuekunft isch das aber so e Sach
E Tram über dBinnigerstroos und no meh
Dr Dorfplatz ohni Verkehr und offenem Bach
sChaos isch vorprogrammiert, mir wärde gseh

Hauptsach es git zu allem e Mitwirkigsverfahre
Eigentlich isch Alles scho plant und mir hän nüt z'sage
E Alibi Üebig, die bringt au kei Mischt vom Charre
Denn muess dr Umzug halt abe an Bachgrabe

Bi dr Gmeind gits aber au eine wo's seriös macht
Zum Glück bisch Du no do
Am Morge, am Mittag, wenns miest sii au Znacht
Dangge Ärnscht, Du fäggsch allewyl no!!